Get it on Google Play
Download on the App Store

श्याम 80

परंतु ते विचारस्त्रष्टेही नाहीत व धान्यस्त्रष्टेही नाहीत अशा करंटया आयतेखाऊ पोषाकी गुलामांनी गुलामगिरीचा घाणा फिरवीत फिरवीत रानावनातील राजा जो गुराखी, गाईची सेवा करणारा, त्याला तुच्छ मानावे ! धान्य देणारा दुनियेचा अन्नदाता जो शेतकरी त्याला हीन समजावे ! हे केवढे आश्चर्य ! केवढी ही कृतघ्नता व उन्मत्तत्ता !

रोमन साम्राज्याच्या -हासाची मीमांसा करताना प्रसिध्द इतिहासकार गिबन याने एके ठिकाणी लिहिले आहे, 'पांढरपेशे रोमन लोक श्रमजीवी लोकांना तुच्छ मानू लागले, हे रोमन साम्राजाच्या -हासाचे एक महत्त्वाचे कारण आहे.' भारतीयांच्याही आजच्या परमावधीच्या -हासाला हेच पूज्य निदान कारण आहे.

प्रतिध्वनति हि श्रेय: पूज्यपूजाव्यतिक्रम:  ।
जे पूज्य आहेत त्यांची जर पूजा केली नाही तर श्रेय:प्राप्ती होणार नाही. आपल्या वेदांमध्ये शेतीची स्तुती आहे. ऋषी सांगतो:-
"अक्षैर्मा दीव्य: कृषिमित् कृषस्य  ।'

गुलामगिरीचे जुगार नको खेळू, शेतीच कर' निढळया श्रमाने मिळवा व खा. कमाओ और खाओ. मजुरीचे महत्त्व तो महर्षी सांगत आहे. परंतु एकीकडे ऋषींचे गोडवे गाणारेच शेतक-यांना तुच्छ समजत आहेत. आपल्या प्राचीन काव्यात बैलाची उपमा वीरांना व थोरांना देण्यात येत असे; परंतु आज 'बैलोबा' ही शिवी झाली आहे. बैल म्हणजे तुच्छ वस्तू व बैलाबरोबर काम करणारा त्याच्याहूनही तुच्छ ! श्रम करणारांची कदर ज्या समाजात होत नसते आणि परपुष्ट बांडगुळांनाच जेथे लोड-तक्क्ये मिळतात त्या समाजाला भले दिवस कसे येतील आणि का येतील ?

मामांचे पोट दुखत असे. त्यावर नाना प्रकारचे उपचार करण्यात येत होते. एक उपचार तर फारच भयंकर होता. त्या प्रकाराला ओरपणी म्हणतात. मामा उताणे निजले होते. त्यांच्या पोटावर ओले फडके ठेवण्यात आले होते. जवळच भट्टी पेटली होती. भट्टीत फाळ टाकले होते व ते लाल झाले होते. ते लाल फाळ मामांच्या पोटावरुन भराभर ओढण्यात येत. त्या ओल्या फडक्याच्या घडीवरुन अत्यंत वेगाने ते लाल फाळ झरझर ओढण्यात येत. पोट भाजू नये म्हणून योग्य ती दक्षता बाळगण्यात येई. मला असे आढळले की, मधून मधून त्या ओल्या फडक्यावर ताक शिंपडीत. तो देखावा भयंकर दिसे. तो सारा प्रकार माझ्याने पाहावला नाही. मी क्षणभर डोकावत असे व फिरुन तुळशीच्या अंगणात निघून जात असे.

मामांचे पोट दुखणे तरीही कमी होईना. पुण्याचे पुण्यश्लोक अण्णासाहेब पटवर्धन यांनी मामांना कुर्डूच्या बियांचे एक औषध सांगितले होते. ते करुन पहावे, असे एक दिवस रात्री त्यांच्या मनात आले; परंतु कुर्डूचे बी कोठे असेल ? आमच्या घराशेजारच्या केळकरांच्या परसात मी कुर्डू पाहिले होते. मी विचारले, 'मी आणू का कुर्डू ?' मामा म्हणाले, 'जा घेऊन ये.' ती रात्रीची वेळ होती. मी दिवा घेऊन गेलो. केळकरांना विचारुन त्यांच्या परसात गेलो, कुर्डू तोडून आणले. मी कुर्डू आणले. ते पाहून मामांना आनंद झाला. त्यांनी मला शाबासकी दिली. म्हणाले, 'श्यामच्या लक्षात सारे असते. त्याचे डोळे चौकस आहेत. तो सर्वत्र पहात असतो.' आई म्हणाली, 'झाडाझुडपांची, फुलांची त्याला हौस आहे.' करंटया श्यामबद्दल गौरवाचे उद्गार किती तरी दिवसांनी श्यामचे कान ऐकत होते ! श्यामला जरा बरे वाटले, श्यामने थोडी अब्रू मिळविली. अंधारात थोडा प्रकाश आला.

श्याम

पांडुरंग सदाशिव साने
Chapters
श्याम 1 श्याम 2 श्याम 3 श्याम 4 श्याम 5 श्याम 6 श्याम 7 श्याम 8 श्याम 9 श्याम 10 श्याम 11 श्याम 12 श्याम 13 श्याम 14 श्याम 15 श्याम 16 श्याम 17 श्याम 18 श्याम 19 श्याम 20 श्याम 21 श्याम 22 श्याम 23 श्याम 24 श्याम 25 श्याम 26 श्याम 27 श्याम 28 श्याम 29 श्याम 30 श्याम 31 श्याम 32 श्याम 33 श्याम 34 श्याम 35 श्याम 36 श्याम 38 श्याम 39 श्याम 40 श्याम 41 श्याम 42 श्याम 43 श्याम 44 श्याम 45 श्याम 46 श्याम 47 श्याम 48 श्याम 49 श्याम 50 श्याम 51 श्याम 52 श्याम 53 श्याम 54 श्याम 55 श्याम 56 श्याम 57 श्याम 58 श्याम 59 श्याम 60 श्याम 61 श्याम 62 श्याम 63 श्याम 64 श्याम 65 श्याम 66 श्याम 67 श्याम 68 श्याम 69 श्याम 70 श्याम 71 श्याम 72 श्याम 73 श्याम 74 श्याम 75 श्याम 76 श्याम 77 श्याम 78 श्याम 79 श्याम 80 श्याम 81 श्याम 82 श्याम 83 श्याम 84 श्याम 85 श्याम 86 श्याम 87 श्याम 88 श्याम 89 श्याम 90 श्याम 91 श्याम 92 श्याम 93 श्याम 94 श्याम 95 श्याम 96 श्याम 97 श्याम 98 श्याम 99 श्याम 100 श्याम 101 श्याम 102 श्याम 103 श्याम 104 श्याम 105 श्याम 106 श्याम 107 श्याम 108 श्याम 109 श्याम 110 श्याम 111 श्याम 112 श्याम 113 श्याम 114 श्याम 115 श्याम 116 श्याम 117 श्याम 118 श्याम 119 श्याम 120 श्याम 121 श्याम 122 श्याम 123 श्याम 124 श्याम 125 श्याम 126 श्याम 127 श्याम 128 श्याम 129 श्याम 130 श्याम 131 श्याम 132 श्याम 133 श्याम 134 श्याम 135 श्याम 136 श्याम 137 श्याम 138 श्याम 139 श्याम 140 श्याम 141 श्याम 142 श्याम 143 श्याम 144 श्याम 145 श्याम 146 श्याम 147 श्याम 148