Android app on Google Play iPhone app Download from Windows Store

 

क्रीडाखंड अध्याय ३४

श्रीगणेशाय नमः । श्रीसरस्वत्यै नमः । श्रीगुरुभ्यो नमः । श्रीक्षेत्रपालाय नमः ।

जयजयाजी संकटहरणा । पुराणपुरुषा विश्वभूषणा ।

जे स्मरती तुझिया चरणा । जन्ममरना जिंकिती ते ॥१॥

तूंच या ग्रंथाचा कर्ता । तूंच यासि वर देता ।

पठण श्रवण कर्त्यांचिया अर्था । पूर्णकर्ता तूंच पैं ॥२॥

श्रोते परिसा सावधान । केलें गणेशपुराण कथन ।

याचें श्रवणें भवबंधन । करी खंडण जगत्पती ॥३॥

प्राकृत ग्रंथ करवोन । भाविकां हातीं दे गजानन ।

याचें स्पष्ट हेंचि कारण । गजवदन कृपाळू खरा ॥४॥

इक्षुदंडाची मधुरिमा । अशक्त भक्षितां पावती श्रमा ।

तिची शर्करा करितां उत्तमा । भक्षणी सुगमा सुखतर ॥५॥

तैसा संस्कृत पुराणाचा अर्थ । काढितां श्रम पावती अशक्त ।

यदर्थ तुष्टोनि एकदंत । ग्रंथ प्राकृत केला तेणें ॥६॥

एके पुरुषें गंगोदक । सुवर्ण आणि रौप्य कलशीं देख ।

भरिलें जें तें निःशंक । सेवणारसि पावन सारिखेंची ॥७॥

तैसे संस्कृत प्राकृतांतील । भगवद्‌गुण जे सेवितील ।

ते गणेशपद पावतील । निश्चयेंसि बोल सत्य हे ॥८॥

ग्रंथरुपें भागीरथी । गणेशें धाडिली भक्ताप्रती ।

यामाजी जे स्नान करिती । ते तरती संसारीं ॥९॥

आधिव्याधि भयआपदा । श्रवणकर्त्यासि न होती कदां ।

यदर्थ भक्तजनीं सदां । ग्रंथ संपदा संग्रहावी ॥१०॥

श्रवणपठणें सकलकाम । पूर्ण करिता पुरुषोत्तम ।

यदर्थ हा ग्रंथ उत्तम । भक्तसत्तम पाहोत सदां ॥११॥

जैसें गणेशपुराणीं व्यासें कथिलें । तैसेंच आहे येथें लिहिलें ।

श्रवण करिती गणेशभक्त भले । कळसास आलें निरुपण ॥१२॥

एकविंशति आवर्तन । या ग्रंथाचीं करितां जाण ।

त्याचे सकलकाम गजकर्ण । करितां पूर्ण निश्चयें ॥१३॥

जरीं सकाम कोणी श्रवणपठण । कर्ता त्यासि हेंच विधान ।

क्रीडाखंडाचा पहिला जाण । परिपूर्णता आवर्तनासी ॥१४॥

ऐसी आवर्तनें एकवीस । करितां पावेल मनेप्सितास ।

गणेश त्याचें संकटास । राहूं नेदील निश्चये ॥१५॥

या ग्रंथाचें करील भावेंपूजन । त्यास होईल परमशोभन ।

त्यावरी तुष्टोन गजवदन । करील अवन तयाचें ॥१६॥

अनंतजन्माच्या पापराशी । श्रवणपठनें जातील विलयाशी ।

सुपुत्र जन्मेल त्याचे वंशीं । हें निश्चयेंशी सत्य असे ॥१७॥

उपासनाखंडाचे अध्याय । बेवीस जाणा अप्रमेय ।

क्रीडाखंडाचे चवतीस गुणमय । येकूण छप्पन्न अध्याय हे ॥१८॥

गणेशें माझें करोनि मिस । उत्पन्न केलें भाविकांस ।

पाहतां पाहतां संतोष आसमास । गणेशभक्तांस होईल पैं ॥१९॥

यांत माझे आर्ष बोल । हे नीट करोत ज्ञानी सकल ।

ग्रंथ मानससरोवरीं मराळ । श्रोते तुम्ही साजिरे ॥२०॥

ब्रह्मानंद गुरुप्रसादें करुन । केलें गणेशपुराण कथन ।

ग्रंथरुपें गजानन । करो अवन भाविकांचें ॥२१॥

नातू उपनाम अलोलिक । मुख्य नाम विनायक ।

त्याचे मुखें गणनायक । ग्रंथ अलोलिक पूर्ण करी ॥२२॥

विक्रमशाक एकोणिशेपांच । शालिवाहन सत्राशें सत्तर साच ।

माघशुक्ल चतुर्दशी जैशी पांच । भोमवासर साजिरा ॥२३॥

ते दिवसीं ग्रंथसमाप्ती । करविता जाहला गणपती ।

तेणें माझें जन्मसार्थक निश्चिती । होवोनि तरलों संसारीं ॥२४॥

इति श्रीगणेशप्रतापग्रंथ । श्रीगणेशपुराण संमत ।

क्रीडाखंड रसभरित । चतुस्त्रिंशोध्याय गोड हा ॥२५॥अध्याय॥३४॥ओव्या॥२५॥

अध्याय चौतिसावा समाप्त

श्री गणेश प्रताप

भगवान दादा
Chapters
प्रस्तावना
अध्याय १
अध्याय २
अध्याय ३
अध्याय ४
अध्याय ५
अध्याय ६
अध्याय ७
अध्याय ८
अध्याय ९
अध्याय १०
अध्याय ११
अध्याय १२
अध्याय १३
अध्याय १४
अध्याय १५
अध्याय १६
अध्याय १७
अध्याय १८
अध्याय १९
अध्याय २०
अध्याय २१
अध्याय २२
क्रीडाखंड अध्याय ४
क्रीडाखंड अध्याय ५
क्रीडाखंड अध्याय ६
क्रीडाखंड अध्याय ७
क्रीडाखंड अध्याय ८
क्रीडाखंड अध्याय ९
क्रीडाखंड अध्याय १०
क्रीडाखंड अध्याय ११
क्रीडाखंड अध्याय १२
क्रीडाखंड अध्याय १३
क्रीडाखंड अध्याय १४
क्रीडाखंड अध्याय १५
क्रीडाखंड अध्याय १६
क्रीडाखंड अध्याय १७
क्रीडाखंड अध्याय १८
क्रीडाखंड अध्याय १९
क्रीडाखंड अध्याय २०
क्रीडाखंड अध्याय २१
क्रीडाखंड अध्याय २२
क्रीडाखंड अध्याय २३
क्रीडाखंड अध्याय २४
क्रीडाखंड अध्याय २५
क्रीडाखंड अध्याय २६
क्रीडाखंड अध्याय २७
क्रीडाखंड अध्याय २८
क्रीडाखंड अध्याय २९
क्रीडाखंड अध्याय ३०
क्रीडाखंड अध्याय ३१
क्रीडाखंड अध्याय ३२
क्रीडाखंड अध्याय ३३
क्रीडाखंड अध्याय ३४