Android app on Google Play

 

आला श्रावण आला श्रावण

 

-    कल्पना देशमुख
नवी मुंबई

हरित तृणांचे ऊन झेलत
दवबिंदूना साद घालत
टपोऱ्या थेंबांचे मोती उधळत
आला श्रावण आला श्रावण...||

रिमझिमतेचा मधुर नाद
उत्साह अन् सृजनतेची साथ
ठायीचे ठायी हिरवे यौवन
आला श्रावण आला श्रावण...||

वसुंधरेला सजवत फुलवत
तनामनात उल्हास जागवत
अमृत धारेने कर सिंचन
आला श्रावण आला श्रावण...||

भावभक्तीची जोड देऊन
दानधर्माचे महात्म्य सांगून
सणांची बरसात घेऊन
आला श्रावण आला श्रावण...||