श्रीकृष्णाची आरती - श्रीकृष्ण गोविंद गोपाळ रा...
श्रीकृष्ण गोविंद गोपाळ राधे । ओवाळूं आरती मंगळानंदें ॥धृ०॥
रोहिणीसुत बळिराम अनंत । अनंत श्रीकृष्ण हा भगवंत ।
अनंत पुण्याचें फळ हें सुबुद्धें ॥ओवाळूं० ॥१॥
ब्रह्म सनातन भक्तपरायण । आला तुझ्या गृहीं अदि नारायण ।
धन्य तुझें बाई भाग्य यशोदे ॥ओवाळूं० ॥२॥
धुंडितां सकलही ब्रह्मांड सृष्टी । न पडेचि हा रवि-चंद्राचे दृष्टीं ।
नाढळे जपतप श्रुतिशास्त्रवादें ॥ओवाळूं० ॥३॥
सकळही गोपी गोपाळ गवळी । आनंदें येऊनि कृष्णाचे जवळीं ।
गर्जती जयजय मंगळवरदे ॥ओवाळूं० ॥४॥
श्रावण अष्टमी प्रति कृष्णपक्षीं । गर्जती श्रीकृष्ण जयकृष्ण पक्षी ।
सुरवर मुनिजन गोधन-वृंदें ॥ओवाळूं० ॥५॥
गोकुळीं जन्मला हरी चक्रपाणी । जाहलें निश्चळ यमुनेचें पाणी ।
वाजती करटाळ मृदंग वाद्यें ॥ओवाळूं० ॥६॥
केशव माधव हे मधुसुदना । पंकजनेत्रा सुप्रसन्न वदना ।
दावी निरंतर चरणारविंदें ॥ओवाळूं० ७॥
जन्मला पुरुषोत्तम विश्वस्वामी । आनंदली सर्व पाताळ भूमी ।
जगीं धन्य विष्णूदास प्रसादें ॥ओवाळूं० ८॥