कवण अपराधास्तव जननी ...
कवण अपराधास्तव जननी केला तूं रुसवा ।
मी तो ध्यातो ह्रदयी तुजला अहर्निश भावा ॥ १ ॥
जय जय दीनदयाळे शांते देई मज भेटी ।
तव चरणाची स्वामिणी मजला आवडी मोठी ॥ धृ. ॥
चिंताकूपी पडलो कोण काढिल बाहेरी ।
धांवे पावे झडकरि अंबे करुणा तूं करी ॥ जय. ॥ २ ॥
माता पिता गुरु दैवत सर्वही तूंची ।
तुझ्यावांचुनि देवी मजला कोणी नलगेची ॥ जय. ॥ ३ ॥
काय असे पाहूनी अंगीकार त्वां केला ।
आतां करणे त्याग तरि हें अघटित ब्रीदाला ॥ जय. ॥ ४ ॥
वेद शास्त्रें आणि पुराणें गर्जति अपार ।
नाम घेता हरती किल्मिष पुरवीं अंतर ॥ जय. ॥ ५ ॥
दास शरण हा अनन्यभावें करितो विनंती ।
तुज वांचोनी मजला न गमे निश्चय दे सुमती ॥ जय. ॥ ६ ॥