Get it on Google Play
Download on the App Store

सैनिकाची पत्नी

पहाटे नेहमी प्रमाणेच दिवस माझा सुरू झाला
उबदार पांघरूणातून तुझ्याविनाच बाहेर पडला
तिकडे तुझा ही सुरू झाला असेल ना रे माझ्या विना
फोटोतल्या मला चुंबताना स्पर्श जाणवे इथे मला

आईबाबांसाठी केलेल्या चहा ने कप भरला
युद्धाच्या बातम्यांनी भरलेला पेपर दारी येऊन पडला
कुणी पहायच्या आत आधाशासारखा वाचून टाकला
 मग निश्चिन्त मनाने चार आसुसलेल्या डोळ्यांहाती सोपवला

आंघोळ करून आरशासमोर कुंकवाचा करंडा हाती धरला
एक दिवस अजून तुझ्या सोबतीचा शाश्वत मला लाभला
तुही निश्चिन्त मनाने जा आता शत्रूवर चढाई करायला
इथे मी आहे घरदाराच्या साऱ्या लढाया लढायला

असशील सज्ज  खांद्यावरल्या बंदुकीने वार करायला
मी ही सुसज्ज इथले सारे वार अंगावर झेलायला
अडचणींचा पाढा वाचून नको चित्त तुझे ढळायला
सारे आलबेल चे पत्र तरी मिळेल  का तुला वाचायला

असतात शेजारी पाजारी ओ देतात माझ्या हाकेला
तूही सुख दुःखाची वाट मोकळी कर तुझ्या दोस्ताला
कुठे ही गेले तरी मान मिळतो सैनिकाच्या पत्नीला
उर अभिमानाने भरुन येतो असतोस सदैव संगतीला

राणा, शिवाजी च्या गोष्टी सांगते मी तुझ्या लेकाला
शूरते च्या तुझ्या गोष्टी ऐकताना गहिवरते आईबापाला
लेक होऊन घेईन काळजी त्यांची सांभाळ तू स्वतःला
दूर शरीराने तरी एकपणाचा वचननामा
निभावू आपला

मंजू काणे ©