बडबडगीत : जादूचे स्वप्न........!
भरत उपासनी
सुटीत जेव्हा राजूला झोप लागते
जादूचे विश्व त्याला दिसू लागते // धृ //
अलीबाबा अलीबाबा आवाज देतो
तिळा तिळा दार उघड मंत्र सांगतो
सोने,माणिक रत्नांची खाण दिसते
जादूचे विश्व त्याला दिसू लागते // १ //
जादूची कांडी फिरवित परी नाचते
चंदेरी सोनेरी पंख तिचे ते
सप्तरंगी,नवरंगी विश्व रंगते
जादूचे विश्व त्याला दिसू लागते // २ //
जादूच्या गोळ्यात कोणी विश्व पहाते
शिंगवाल्या राक्षसाची गर्जना येते
जादूच्या गुहेत मन छान रंगते
जादूचे विश्व त्याला दिसू लागते // ३ //
जादूगार जादूगार गम्मत करतो
जादूच्या टोपीतून ससे काढतो
रिकाम्या डब्यातून मिठाई येते
जादूचे विश्व त्याला दिसू लागते // ४ //
सिंदबाद,बिरबल,टारझन छान
हिमपरी,सात बुटके सारे जमणार
इसापनीती छान गोष्टी सांगते
जादूचे विश्व त्याला दिसू लागते // ५ //
अल्लाउद्दीन घेऊन येतो जादूचा दिवा
जे हवे तुम्हाला ते सारे मिळवा
जादूच्या दिव्यातून सारे मिळते
जादूचे विश्व त्याला दिसू लागते // ६ //
दूध पितो, खाऊ खातो, म्हणतो, मला वाचू द्या !
नवरंगी गोष्टींचे विश्व सजू द्या
वाचून वाचून थकला की झोप लागते
जादूचे विश्व त्याला दिसू लागते // ७ //